二零零一年四月一日 星期日

天滿橋 > 大阪城公園 > 電器街/黑門市場 > 心齋橋 > 梅田

八點幾起身, 又開始今日的行程.

首先係落樓下LAWSON買早餐, 而我們揀了熱騰騰的中華料理”飽飽”同鮮奶, 陳小姐仲加隻烚旦. 食完早餐攪掂晒, 就開始今日的觀光行程, 第一站係大阪城公園. 由酒店行去, 轉個彎直行大約五分鐘就到. 我們到大阪城公園的目的, 唔係去大阪城, 而係去睇櫻花, 而一直沿途都見有櫻花係路旁.

由於時間尚早, 遊人唔係咁多. 嘩! D櫻花好多好靚呀! 有好多日人真係帶埋膠地布, 一家大細去霸位賞櫻花呀! 而我們呢D遊客行個圈, 影下相就好滿足喇!

下一站係電器街加黑門市場, 由天滿橋站搭地車三個站轉一次車就到. 電器街兩旁都係賣電器, 據聞售價係平過東京秋葉原. 但係我好想買的Gameboy Advance就全街sold out, 在無理由空手而回的原則下, 我就買左部數碼相機(FUJI FX-4500). 黑門市場同電器街其他係一街之隔, 兩條街係平行的. 可能時間唔夾, 十二點的市場內好多店鋪都冇開, 由於好肚餓, 所以買左兩隻炸蝦食. 嘩, 好美味呀, 仲有炸魷魚鬚送.

食左d野, 就往心齋橋方向行去, 照地圖指示約15分鐘就到喇! 嘩, 沿路都好多野賣, 好熱鬧, 重好多人呀! 行行下, 又去返尋晚黎過的心齋橋. 終於, 揀左一間日式餐廳食午市定食, 都係幾百yen, 又抵又好食. 之後, 又係重點出擊-去挾公仔呀! 在日本d旺區, 行幾步就有遊戲機舖, 而今日的收穫都唔錯啦, 仲有隻爆炸狗’碌’落個洞口度喎!

行到四點幾, 係時候返酒店抖下. 傍晚時份, 我們又搭兩個站車, 到左梅田購物區. 個度又係好多人好多百貨公司, 又有shopping center, GAP仲有特價喎! D橫街窄巷又有得挾公仔, 但係飛機Donald挾極都挾唔起, 成隻挾起都趺番落黎, 正想放棄時, 個遊戲機舖職員將隻公仔放在虎口邊, 嘩, 好大壓力呀, 呢d擺明俾你的, 分分鐘唔得喎! 好彩幸運之神有同我一齊, 一撩攪掂! 之後, 食左碗麻麻地的拉麵做晚餐, 就回天滿橋.

返到酒店, 梗要幫戰利品影將相啦! Overall黎講, 今日的收穫都唔錯, 咦…點解有條電線在熱水壺旁, 係咪要插電掣, 就變成電熱水壺呀?

arrow
arrow
    全站熱搜

    ec2eat 發表在 痞客邦 留言(6) 人氣()