二零零一年四月三日 星期二

天滿橋 > 南港Hyatt > 環球片場 > Hyatt

唔經唔覺, 已經踏入旅程的第四日. 對於日本的電車subway之類的交通工具, 已有一定的掌握, so far都未試過搭錯車落錯站, 仲識搭特急呀! 今日早餐未食,晨早七點幾, 就趕去搭地車, 為咩? 為左避開返工的人群, 搭車去南港的Hyatt, 兩個人拖住三大件野, 都幾異相.

日本地車最唔好的地方就係唔係度度都有電梯上落, 我同陳小姐要一級一級咁拖D野落去車站, 一共抬左三大組樓梯, 可以停一停, 依多日的觀察, 前面再落係有扶手電梯的. 咦…點解有個大嬸在架升降機度行出黎的, 仲應該係由地面搭落黎個種, 點解…

好彩跟住一路轉車都只係行幾級樓梯就ok, 都轉左兩次車, 搭左約半個鐘再轉坐冇人駕駛, 終於到左中ふ頭站喇, 而Hyatt過條馬路就到, 不過拖住行李, 過條馬路都要十分八分鐘. 沿路行, 天陰陰, 仲有d毛毛雨, 可能又近海, 都有小小凍. 一入到Hyatt後門, 就即刻有bellboy過黎拎行李, 真係一分錢一分貨, 而酒店係網上訂的, 包埋環球片場(USJ)入場卷, 唔使自己撲飛, 因為USJ三月三十一日先開, 預售票己無哂, 要保證一定有飛, 可以入住Hyatt呢d USJ official hotel, 就一定有入場卷.

由於無咁早有房, 我同陳小姐就先去環球片場. 攪攪下都成九點幾先到, d毛毛雨仲落下落下, 今朝天氣報告話得三,四度咋… 但係凍, 都難掩我興奮的心情, 話哂新開, 個廁所都香d啦! 可能落雨關係, 人都唔係咁多, 但排隊玩遊戲的人龍都唔短, 我第一時間話要玩Jaws大白鯊, 原因只得一個, 就係我未玩過. 排左40分鐘, 就有得玩, 比原先估計的少, 但點解D日人個個著雨褸的? 坐隻船有蓋個喎! 又唔使沖落去的, 份日文地圖又冇話會濕身(有講都唔知, 因為只有日文, 冇其他選擇)… 結果, 大白鯊旅程都幾驚險, D大白鯊會失驚無神彈出黎, 又幾真的, 日人小朋友仲嚇都喊, 而D水係由左右兩邊飛撲埋黎, 冇得避, 我們即時想起霖霖, 佢一定叻過日人小朋友, 一定喊得仲大聲, 為港爭光!

玩左第一個遊戲, 先記得未食早餐, 又凍又落毛毛雨, 都係食d炸雞薯條先! 坐係度食野, 一邊食, 一邊睇下景啦! 呢個環球片場中間係一個湖, d遊戲就圍住四周, 夜晚在湖上有表演睇的. 抖左一陣, 就去下一個遊戲Jurassic Park, 條人龍排到出門口喇, 好彩呢個game有fast pass的, 排左下晝四點半. 見WATER WORLD個show都差唔多, 就去睇左先啦! 一黎就玩下人浪先, 再做下動作, 當中的對白全日文, 我又好似明明地啦! 都唔記得個show係日文定英文, 總之同美國個show差唔多啦! 睇完個stunt show, 就去左USJ獨有的SNOOPY’S PLAYLAND, 成個area都係同Snoopy & friends有關, 又有water slide同迷你roller coaster, 我地只係玩左迷你過山車, 因為玩water slide會濕身.

嘩! 見到Snoopy呀, 唔駛去美國都見到佢呀! 之後, 忍手咁耐, 都要買番小小野啦, 費事唔認得路, 返唔到轉頭買. 我最開心就係買左個相機袋俾我的新寵’數碼相機’, 係好fit又有型呀! 但係d雨又落下停下, 心情都差d, 因為真係好凍.

可能USJ新開, 食野的地方唔多, 而食品又好美國, 幾經辛苦, 搵到間有飯食的東南亞快餐店-Jurassic Park餐廳, 陳小姐叫左雞脾飯, 而我就要牛扒飯, 可能由於又凍又餓, 所以覺得特別好食. 飽餐一頓後, 玩左Terminator2同埋Animation Celebration-Woody Woodpecker, 兩個都係3D show, 都好好睇, 而後者最初以為好悶, 點知原來好得意過癮. 之後, 我們又去番Jurassic Park個邊行下, 張fast pass係4:30p.m., 未入得住, 就在呆呆下的時候, 有個日人俾左張4:00p.m.的fast pass我們(可能係我們靚的緣故), 咁我們即刻買件200yen的便利雨衣入去玩. 由於我之前玩過, 所以知道呢個係極濕身的遊戲, 我們著好雨衣, 排隊上船. 好野, 係第一行呀! 一上船, 我再三叮囑陳小姐綁好件雨衣, 佢已經綁到睇唔到野, 但一開船, 我們都已經凍到震, 陳小姐隻腳係震到我都feel到, 再濕下濕下, 未到最後沖落去, 已凍到僵, 所以沖落去個下都冇咩感覺喇! 由於前面仲有好多船等上岸, 所以我們仲有排坐係度凍啊!

一落船, 我們即刻走入間shop暖番個身先啦! 過左一陣, 個身冇咁震, 但係d雨就冇停到, 不過著住件膠雨衣都可以保下暖. 由於環境越來越惡劣, 我們被迫撤退. 撤退還撤退, 亦不忘於USJ外的City Walk購物一番. 之後, 我們搭番船去Hyatt, 而我們的行李亦已送上房間. 而五星級酒店係唔同d, 間房都舒服d. 由於我仲好凍, 都係沖個熱水涼先!

整完一輪, 我們成七點先到酒店對面的ATC購物商場, 個outlet大部份店鋪都關門啦, 但又俾我們買到小小野啦! 跟住, 又去左Sega World, 在ATC四樓, 個場好大, 但又無咩人, D職員又好nice, 夾唔到或夾咩左, 都會幫你放番好. 好彩叫做夾到d, 如果唔係一定唔肯去食飯喇! 行行下, 去左一間日式中華料理, ok喇, 食得飽但冇驚喜, 好miss尋晚的豬扒同燒魚呀! 食完飯, 買埋明日早餐就返酒店, 我第一時間打去house keeping問佢拎多個枕頭, 話晒咁貴一晚, 梗係用盡佢啦!

USJ大白鯊


南港Hyatt

ec2eat 發表在 痞客邦 PIXNET 留言(3) 人氣()


留言列表 (3)

發表留言
  • USJ真是比大阪市區內凍!我05年聖誕節入園,明明是著夠衫,入到去,勁凍勁大風,尤其<br />
    是在人工湖面的橋上,簡直寒風入骨!
  • lau2tang
  • 上面是我的留言,因為睇得太開心,唔記得log in!
  • ec2eat
  • 我翻一下相簿, 原來我已經著左長袖tshirt加fleece喇!<br />
    (其實我有夾棉, 不過晌酒店, 前一日晌京都熱到不得了, 估唔呢度到咁凍)