彭彭堂

15/16之後, 又被徵召入伍, 來過21/22, 留港消費, 目的地係迪士尼!

由一開始知道香港會有個迪士尼, 已經唔多高興, 所以一直無計劃要去… 但老闆娘一聲令下, 即刻打電話, 訂酒店! (按: 這個老闆/老闆娘不是有工作關係的, 只是對我來說也是米飯班主之一)

用渣打信用卡預訂及付款, 會有免費早餐附送(一房最多最多送四份), 但要送卡通人物早餐, 就要住香港迪士尼酒店, 由現在至八月底, 一房最低消費為HKD1900+13%...

訂房時, 最平的是海景客房, HKD2100+13%... 唔該兩間呀!

今次本地遊的成員除了老闆, 老闆娘, 少爺仔之外, 還有姨媽(即少爺仔之姨媽), 表姐(少爺仔之表姐), 吳小姐(北海道團友), 以及小彭. 7個人, 咁咪蝕左個早餐? 成HKD198個喎… 叫彭媽第二朝入黎食先, 唔好浪費嘛…

對於表姐同吳小姐, 呢個本地遊是一個考驗… 第一次跟別人(沒有爸媽)的情況下留宿!

星期五, 請了半天假, 拿著大旅行袋(比15/16的背包大很多), 往青衣城集合吃午餐. 小朋友很易熟絡… 只要一同玩遊戲機, 帶帶任天狗!

吃飽後, 吳小朋友跟媽媽道別, 就搭乘東涌線往欣澳, 再轉列車往迪士尼. 對於小彭來說, 欣澳站, 迪士尼站, 是一個新景點, 因為只有我未黎過… 但小朋友們的心, 當然只會向著迪士尼, 想停下來, 看多眼也沒機會!

不一會已到達迪士尼站, 步出車站, 已感到陽光熾熱, 幸好還有點微風… 趕急帶上CAP帽, 一直行… 為什麼沒有往酒店SHUTTLE BUS的指示牌呢?! 其實車站就在地鐵站後面, 所有巴士, 公共交通都在那裡, 大家掛住防曬而咩都睇唔到!

上了SHUTTLE, 到達酒店已是三點, 剛好是CHECK IN時間. 就在排隊等CHECK IN時, 已體會到內地團體的威力… 其實條Q只有兩個人: 小彭及後面的人, 以下是大致的對話.

領隊: (步行至櫃台)PARTY CHECK IN…
DH(Disney Hotel Front Desk負責維持秩序的人員): 唔好意思, 請晌呢度排隊CHECKIN…
領隊: PARTY都要排隊, 度度都唔使啦… 我成班人喎, 唔通叫佢地黎…
DH: 唔好意思, 係要排隊, 如果唔係對排緊隊的人客會唔公平!
領隊: 咁係咪要玩大佢先, 要我班客黎排隊…
DH: 唔好意思, 係要排隊…
領隊: 好… (走到門口, 對住D客)… 話要大家排隊喎, 大家拎晒D野過黎…
DH: (對排頭位的小彭說)唔好意思, 要你等, 如果俾佢地先, 會對大家唔公平!

此時, 已到小彭CHECK IN…

DH(Front Desk職員): 彭小姐, 你定左兩間海景房, 我地upgrade左你去Kingdom Club客房, 其中一間會係suite, 有一間房已經ready, 另一間仲打掃緊, 不如攞左一間房先, 唔知有無問題呢?
小彭: 無問題… (其實當時我只聽到upgrade個兩個字)
DH: 請等等, 會有同事帶你上七樓check in…

小彭當時只想離開個Front Desk, 即刻叫晒班靚跟住個哥哥行去lift口… 一入lift, 就展開了奇妙旅程! 

(待續~)

香港迪士尼酒店