彭彭堂

休息(腸胃)了一星期, 約了M&N晚飯, 本屬意佢地屋企附近的小菜館, N突然轉軚, 話去廟街!

橫掂係N俾錢, 是但啦, 不過係有D擔心, 食完會唔會肚痾呢!?

午間天氣酷熱, 但晚間氣溫卻還可以接受!

啊... 晚間的廟街(佐敦)原來係咁樣! 係呀, 我未試過夜晚去廟街, 平日都是路過而已!

N好快搵到之前到過的一所食店, 好多外籍及內地遊客幫襯, 外籍遊客就多數坐露天, 而我們就梗係坐室內冷氣位啦!

好快點左炒蜆, 灼司庵, 蠔餅, 蒸貴妃蚌, 炒菜及炒麵!









唔知係咪怕遊客食左會出事, 所以無論係炒, 灼, 蒸都係overcooked. (後來伙計說如要唔好太熟或生小小, 可事先要求)

第一次吃司庵, 原來司庵係咁鮮甜! N說: 咪係あかがい（赤貝）囉! 如果生D, 會滑好多!

蠔餅其實可以叫粉餅, 因為只係一餅粉, 呢D野只可呃到外籍遊客!

最好的是炒菜, 夠鑊氣, 而炒麵亦唔算油... 而汽水, 係唔知邊個中東國家的出品!

N: 去另一邊食蠔餅, 個D先至係真正蠔餅... 個邊仲有豬骨粥, 煲仔飯, 好抵食...

埋單, $250!

行廟街的, 九成以上是遊客, 幸好大家都換上T恤短褲涼鞋, 都有旅行FEEL啦!

經過左PALM READING, BONE READING檔攤, 去到油麻地個面的廟街. 一行入去, 對我最觸目係歌廳, 門面有D似90年代初期的社區中心/青少年中心, 有大量HELLO KITTY裝飾, D叔叔伯伯就晌入面飲酒...

呢邊的食檔, 明顯係靜好多... $18個煲仔飯, 水準係點? 都係寒冬先食啦!

來到蠔餅店, 店外只有兩張枱仔, 點了一 個小的.

看見嬸嬸打蛋, 加蔥, 落鑊... 上桌了, 咁大碟的, 有兩塊喎, 是大的嗎!?



"$20" 這是細蠔餅!

脆卜卜的面層, 吃入口, 是有蛋味, 蔥很香, 而蠔是新鮮且足料! (這跟先前吃的, 是天堂與地獄的差別!)

食食下, 有個大叔蹲在前面的竹籮前, 把一D野收在籮底... 唔會係咩話, 我好驚個喎!

原來係鎖匙, 那是用來開隔離大廈大門的鎖匙, 那大叔是賣老翻光碟的!

廟街, 真是一個有趣的地方!