彭彭堂

依我的性格, 經此一役, 應該唔會鐘意呢個地方, 仲要係請都唔會再去!
結果係點, 大家都知道!
睇番呢個前傳, 可以解釋或影響到宜家自己的日遊態度及行為, 真是蠻有趣的!

DAY 6開始係06’先寫, 看起來有點草草了事, 不過我真係記不起當中的細節了!

二零零一年四月九日 星期一
池袋 > 機場 > 香港
由於今日唔包早餐, 又搭早機, 所以一早搭LIMO去機場. 由於大大小小夾埋有七八件, 所以要叫人幫我們推D行李落去.

沿路暢通無阻, 好快就去到機場. 地勤一見我們大包細包, 就將所有行李上磅. 心想: "出事!" 共重: 九十幾公斤!

二零零一年四月七/八日 星期六/日
池袋/涉谷/原宿/上野
呢兩日印象好模糊, 連食左d咩, 都唔係好記得. 但行程總不外乎shopping同夾公仔!
於酒店吃過早餐, 便乘山手線往涉谷. 根據旅遊書, 於八千公出口出, 終於見到八千公, 不過圍住好多人, 所以無影到相. 一直向109方向行, 都有好多店鋪, 行過幾間百貨公司, 但D野唔多啱我. 除左百貨公司, 就梗係晌夾公仔店觀摩一下. 途中經過JACKY KITCHEN, 話晒都係一個景點, 就同成龍影左張相. 之後行番去八千公個面, 過左橋底轉左, 沿明沿通往原宿方向行一直行. 分別經過BURBERRY同UNIQLO, 就入去行一下, 但D斤新貨唔係咁多, 所以無幫襯. 再往前走, 就見到GAP同LAFORET, 不過無咩野啱! 見到pancake店後, 轉上竹下通往上走, 但d野真係唔多啱我, 而且又唔係平, 我唔識佢, 佢又唔識我, 點買得落手喎!
返到原宿站, 搭番山手線返池袋休息, 因為已經好攰.

二零零一年四月六日 星期五
舞濱 > 海濱幕張 > 池袋
今朝起身, 拎埋部相機, 前往餐廳chef mickey, 因為我地約左mickey食早餐呀! 早餐係buffet形式, 有好多野食, 而mickey & friends就會逐張咁去, 同d食客影相. 而早餐就只限酒店的住客. 晌呢度, 唔使同日本人爭, 就可以好舒服地影到張相. 而我仲拎住mickey pancake, 同chef mickey影相, mickey見我咁捧場, 梗係好開心啦! 輕鬆一個鐘, 就check out同寄存行李! 下一站, 係海濱幕張的garden walk.

由舞濱出發, 大概要半小時才到達. 一出車站, outlet就在面前. 消耗了約兩小時, 晌nike買了對presto, 平香港一半價錢呢! agnes b無好野賣的, 衫方面, 比較適合陳小姐. 拿著一袋二袋 , 又去番舞濱, 晌酒店整理完行李, 就起程返去池袋了!

二零零一年四月五日 星期四
池袋 > 舞濱 > 東京迪士尼樂園
今日六點幾起身, 因為我們要搭大概一小時車去迪士尼呀!

首先, 我們搭山手線到東京站, 再轉京葉線到舞濱站. 由於我們已習慣搭日本的電車, 所以左轉右轉, 都唔係問題. 沿途都見有好多靚妹, 個款都係去迪士尼, 點解佢地唔使返學咩?

二零零一年四月四日 星期三
大阪 > 東京 > 池袋 > Sanrio Puroland > 池袋
九點左右起身, 開個窗簾睇下南港的景色, 幾靚呀. 窗旁又有張枱, 一邊食早餐一邊睇景, 真係幾舒服! 可惜只住一晚! 食完早餐, 就執行李, 準備去機場, 今日我們會乘內陸機到東京, 而我們暫時夾到的公仔, 已塞滿一個超大型旅行袋, 而收穫應該陸續有黎喎?!
由酒店到機場, 只要半個鐘左右, 關西機場係建在一個人工島上, 並以橋連接, 沿途風景唔錯, 但好大風, 亦好明顯, 係睇到d風大到吹郁架車的.
由於比原定時間早左好多到機場(兩個幾鐘), 我們就打電話返香港. 上到機, 有d餓, 先記得domestic flight係冇chicken or beef, 只有coffee or tea同兩粒花生. 轉眼, 就到左東京, 今次由於係白天, 降落時個camera睇得好清楚. 咦, 隔離有架比卡超飛機, 即刻用數碼相機影低先!

二零零一年四月三日 星期二
天滿橋 > 南港Hyatt > 環球片場 > Hyatt
唔經唔覺, 已經踏入旅程的第四日. 對於日本的電車subway之類的交通工具, 已有一定的掌握, so far都未試過搭錯車落錯站, 仲識搭特急呀! 今日早餐未食,晨早七點幾, 就趕去搭地車, 為咩? 為左避開返工的人群, 搭車去南港的Hyatt, 兩個人拖住三大件野, 都幾異相.
日本地車最唔好的地方就係唔係度度都有電梯上落, 我同陳小姐要一級一級咁拖D野落去車站, 一共抬左三大組樓梯, 可以停一停, 依多日的觀察, 前面再落係有扶手電梯的. 咦…點解有個大嬸在架升降機度行出黎的, 仲應該係由地面搭落黎個種, 點解…
好彩跟住一路轉車都只係行幾級樓梯就ok, 都轉左兩次車, 搭左約半個鐘再轉坐冇人駕駛, 終於到左中ふ頭站喇, 而Hyatt過條馬路就到, 不過拖住行李, 過條馬路都要十分八分鐘. 沿路行, 天陰陰, 仲有d毛毛雨, 可能又近海, 都有小小凍. 一入到Hyatt後門, 就即刻有bellboy過黎拎行李, 真係一分錢一分貨, 而酒店係網上訂的, 包埋環球片場(USJ)入場卷, 唔使自己撲飛, 因為USJ三月三十一日先開, 預售票己無哂, 要保證一定有飛, 可以入住Hyatt呢d USJ official hotel, 就一定有入場卷.

二零零一年四月二日 星期一
天滿橋 > 四條河原町 > JR京都 > 清水寺 > 天滿橋
今朝, 終於有個熱辣辣的杯麵(加旦)食喇! 之後, 我們坐京阪電車, 大約四十分鐘就到達京都四條河原町, 個度係京都最新shopping熱點. 我們入左一間百貨公司, 我就去打電話confirm機票, 陳小姐先去行個圈. 就係打個電話的時候, 陳小姐好快手咁就買左個Anna Sui手袋喇! 今日行百貨公司有樣好, 就係唔使同人迫, 可以慢慢揀, 但係我唔明, 我話明唔識日文, 但d sales都係同我一輪咀咁講日文. 行左一間百貨公司, 我們就收穫豐富, 之後, 就前往第一個景點-京都NAMCO. 唔…戰績都OK! 但係我們拎咁多野, 點去清水寺呀?
在去JR京都站前, 我們將D野store在locker, 到左京都站, 又先去ISETAN shopping, 買左Blue Labels先安樂. 行到咁上下, 就是但搵間壽司店食lunch. 嘩, d壽司好正, 個麵豉湯係超級勁好飲, 想俾錢order多一碗都唔得呀!
大約三點, 我們先開始去清水寺, 搭車又人多, 天氣又幾熱, 仲要行條大斜路先到. 上到去, 陳小姐已經坐低唔行喇, 而我就係咁影將相到此一遊就算, 而四周都無咩櫻花睇, 都呃人的. 跟住, 又要迫一輪巴士先返到京都站, 之後去番河原町搭車返大阪.

二零零一年四月一日 星期日
天滿橋 > 大阪城公園 > 電器街/黑門市場 > 心齋橋 > 梅田
八點幾起身, 又開始今日的行程.

首先係落樓下LAWSON買早餐, 而我們揀了熱騰騰的中華料理”飽飽”同鮮奶, 陳小姐仲加隻烚旦. 食完早餐攪掂晒, 就開始今日的觀光行程, 第一站係大阪城公園. 由酒店行去, 轉個彎直行大約五分鐘就到. 我們到大阪城公園的目的, 唔係去大阪城, 而係去睇櫻花, 而一直沿途都見有櫻花係路旁.

二零零一年三月三十一日 星期六
香港 > 大阪 > 天滿橋 > 心齋橋 > 天滿橋 
無論去邊度旅行, 我一定都會帶著興奮的心情出發. 今次當然都唔例外, 仲要係加倍的緊張. 因為今次係我第一次去’扶桑’, 同時係採用自助旅遊的形式, 所以份外覺得興奮. 抱住唔衰得的心情, 旅程開始了!

中午時份到達機場, 乘搭ANA客機到大阪. 日本, 對我來說是印象模糊, 而今晚住的酒店, 係從網上預定的, 地圖資料都係由網上得到的, 實際情況又係點? 落左車會唔會行好遠? 唔使行天橋/隧道嘛? D房掂唔掂? 其實在計劃行程安排以來都有好大的壓力, 因原先想定的酒店冇房, 所以迫住要在大阪自己book房, 改完又改…擔心都多餘的, 三個多小時的機程, 已到達大阪的關西機場了!