昨天看見了三杉淳兄的一篇關於旅行同伴的文章, 很想跟大家分享一下. 全文如下.
(特別鳴謝三杉淳兄允許轉載)

去日本旅行本應係開心事, 但偶然亦會聽到一些不愉快的經歷, 其中不少是來自結伴同遊的人, 而問題多數係關於行程上的分歧、各人習慣不同、喜好各異、性格不合、分工不勻, 所以如果想有一個開心的旅程, 出發前慎選旅伴, 加強溝通便成為一件很重要的事情.

一般人去旅行, 身邊的同伴大多不離以下幾種:

1. 男女朋友, 又或者丈夫太太子女;
2. 家人或親戚, 例如父母兄弟姊妹;
3. 同學, 普通朋友, 又或者所謂"好朋友";

上述三種類型的同伴, 第一種和第二種由於關係比較親密, 即使偶有爭拗或分歧, 基本上都不難取得妥協, 較為容易解決問題, 但第三種的所謂"朋友關係", 通常去到旅行途中就會變得非常脆弱, 一旦未能妥善處理當中的利害, 雙方友情隨時因而受損, 令人留下不快的回憶.

旅途中的爭拗, 大多出自以下幾種原因:

1. 分工不勻: 有啲人對旅行會表現得非常積極(通常係帶頭話要去那個), 決定要去旅行就會坐言起行, 立即去訂機票和酒店, 之後又會不停搜集資料, 編排行程, 務求設計出一個合乎自己心意的旅遊計劃; 另外有啲人則比較被動, 甚至"不動", 即係乜都唔願做, 亦唔打算俾任何意見, 只係叠埋心水準備跟住人地去玩, 本來問題唔大, 但最攞命就係佢地往往去到目的地後才諸多挑剔, 令原先做嘢最多那個大感委屈, 衝突即由此而起;

2. 行程分歧: 各人對旅程的喜好唔一定相同, 例如一講到要去"購物", 女性當然會拍手歡呼, 但很多男性就唔太願意花上過多的時間在這個環節之上, 佢地會寧願去打機或睇玩具; 另外有啲人對所謂"名勝古蹟"或"自然風景"興趣不大, 一旦去到這些地方即大發牢騷, 猛話要走, 同樣會令同行者索然無味;

3. 口味各異: 不知你有否遇過"偏食"的人? 我就有個這樣的朋友, 同呢類人一齊去旅行, 你話想食"烤肉", 佢就話好"熱氣", 你話要食"魚生", 佢話唔食"生嘢", 你話想試"日式", 佢話不如"西式", 你話想食貴嘢, 佢話要食平嘢, 啲錢留返買嘢好過, 總之大家每每為此爭持不下, 絕對會死好多細胞;

4. 習慣不同: 呢樣嘢最令人防不勝防, 例如有啲人你即使認識多年, 但你估唔到原來佢在早上會霸住個洗手間成粒鐘, 又或者叫極都唔醒; 有些人可能自己唔鍾意帶護膚品, 但去到旅行就用埋你那枝價值幾百蚊的防曬霜, 叫你大為氣結;

5. 性格不合: 有些人比較不拘小節, 旅途中稍有不快事, 亦不會太計較; 但有些人則非常"小氣", 遇有任何不順心的事情, 非要他人遷就自己不可, 否則就發晒老脾, 另一種人屬"百彈齋主", 去到旅行, 永遠嫌呢樣唔啱, 個樣唔好, 無論食乜、玩乜、睇乜, 通通有彈冇讚, 令負責設計行程的人極度無癮, 若果平日在香港間中見面, 可能仲會不以為意, 但出外旅行, 日對夜對, 就會非常容易鬧翻.

如果想避免發生上述問題, 希望能夠好好跟你個同伴相處, 一起享受一個愉快旅程, 有幾樣嘢就應該要注意:

● 出發前一定要多啲溝通, 大家坐埋一齊研究全個行程, 講明每日會去乜嘢景點, 該處有乜嘢玩或睇, 將會逗留幾耐, 每餐食乜嘢, 全部皆要交代清楚, 唔啱傾到啱, 盡量預先將彼此分歧縮窄, 去到目的地後就會少啲拗撬;

● 如果對方濶佬懶理, 表示一切由你話事, 咁就最好事先約法三章, 講明一切行程安排由你決定, 其他人不得異議, 唔使去到先至互相埋怨;

● 食嘢口味唔夾, 不妨去到後分開"搵食", 食完再會合, 繼續行程; 同樣道理, 一齊去旅行, 唔代表一定要日日走在一起, 遇上有唔同的喜好或想去其他地方, 大可安排有一兩日大家各自分開活動;

● 若同住一房, 擔心各自生活習慣唔同, 記緊要先小人後君子, 同對方講明一啲日常規矩, 例如輪流使用洗手間的時間, 各自帶備自己所需日用品, 每朝幾點起床, 諸如此類, 大家有言在先的話, 爭執自然可以減少;

● 萬一你自覺大家性格不合, 未必一定可遷就或忍受到對方, 就最好重新考慮是否要同對方一齊去旅行, 千祈唔好但求有個同伴, 明知對方未必一定適合亦勉為其難, 最終搞到朋友都冇得做!


三杉淳兄提到的爭拗, 其中四樣也曾遇上過, 多數是出現在兩個人以上的旅行. 如果只是二人的旅行, 我是會根據同伴的喜好, 編排好合適而我又可接受的行程. 面對爭拗, 我的處理方法會是選擇去妥協而放棄自己的決定, 縱然有時其他同伴會說其實不用去理會及太在意, 但事實上一句或許是無心的說話, 已會令我唔開心(這是我個人的性格缺憾). 我也嘗試過三杉淳兄的注意事項, 但做了不等如問題不會出現, 亦不是每個人也會明白.

我祈望著, 下一次的旅程, 也會是愉快的.
創作者介紹

彭彭堂

ec2eat 發表在 痞客邦 PIXNET 留言(12) 人氣()


留言列表 (12)

發表留言
  • carjaswong
  • 老實說,一班人去旅行真係好難搞,人越多,日期越長,行程彈性低的越難,所以多過四人的,都是可免則免.
  • ellen
  • 到現在為止,老師還幸運地從未遇上過不愉快的旅程!

    結伴去旅行時,當主導~~我試過,當被動參與的~~我也試過。老師會絕對安份守已,做好每個角色的本份!
  • 小彭
  • 唔... 對我黎講, 人數並唔係問題囉, 如老師所言, 最重要係做好自己個角色, 安守本份, 但難就難在唔係人人都明白.
  • lau2tang
  • 我很幸運,除了家人外,咁耐以來還未遇過這種情況,每次都是開開心心的回來!
  • 紅米奇
  • 幸運地我每次的遊伴都沒有問題
    可能不論食、住、買、觀光等任何靜態或動態活動我都無所謂
    絕對相信做主動的會比較容易感受每個流程細節
    所以三杉淳所言甚是, 就算無發生在自己身上
    但都很明白當中原箇
  • 大頭仔
  • 上次去日本
    團友抱怨我編排得很好的行程
    我咪“丙”番佢囉!^_^
  • HY
  • 1. 在途中儘量不動聲色,能遷就便遷就
    2. 不遷就,就拉倒,通常做法同 1
    3. 沒這麼誇張,但的確遇過麻煩友
    4. 好彩未試過,亦應該唔會試到
    5. 我係事後小氣,但又未曾因為旅行不快而疏遠某人

    約法三章根本沒用
  • 小彭
  • 大頭, 係咪抱怨去得太短時間呢?! ^^
    HY, 邊有約法三章呢回事呀! 只有做好(自己認為嘅)本份囉!
  • 小頭
  • 暫時未發生過一齊去完旅行絕交的事情。

    自己都幾自我和固執,幸好同伴也很包容和體諒。我梳洗十分魔慢的,所以要和同伴協調時間。另外呢,我不是一個整齊的人,所以同人一間房時要提醒自己東西不要亂放。(所以呢,小儀姐要想清楚啊!)

    口味和興趣各有不同,劃出自由時間活動和吃自己想吃的東西也未嘗不可。最要緊開心見誠,小心措詞,不要屈在心裡令不滿擴大。

    之前的深秋之旅多得各小友包涵,謝謝。
  • 大頭仔
  • 我都唔想架!
  • 小彭
  • 絕交我又好似無, 不過又真係無見過又或者無聯絡, 因為有D團友真係唔係好熟, 自怪當時年少無知. 不過我又衰, 勁黑面又發老脾, 好黑人憎! :P 跟住落黎再攪自遊行, 已經係日遊年代, 又係另一個世界.

    劃出自由活動及各自搵食並唔適用於所有人囉!
  • 阿茄
  • 我也幸運地,我和朋友一起去旅行都未有不開心或太大問題,我也抱著無所謂的心態,多包容,最緊要大家開心就可以了。

    細細聲講,反而同屋企人去就要用忍的方法,唔忍好大鑊架。