二零零一年四月四日 星期三

大阪 > 東京 > 池袋 > Sanrio Puroland > 池袋

九點左右起身, 開個窗簾睇下南港的景色, 幾靚呀. 窗旁又有張枱, 一邊食早餐一邊睇景, 真係幾舒服! 可惜只住一晚! 食完早餐, 就執行李, 準備去機場, 今日我們會乘內陸機到東京, 而我們暫時夾到的公仔, 已塞滿一個超大型旅行袋, 而收穫應該陸續有黎喎?!

由酒店到機場, 只要半個鐘左右, 關西機場係建在一個人工島上, 並以橋連接, 沿途風景唔錯, 但好大風, 亦好明顯, 係睇到d風大到吹郁架車的.

由於比原定時間早左好多到機場(兩個幾鐘), 我們就打電話返香港. 上到機, 有d餓, 先記得domestic flight係冇chicken or beef, 只有coffee or tea同兩粒花生. 轉眼, 就到左東京, 今次由於係白天, 降落時個camera睇得好清楚. 咦, 隔離有架比卡超飛機, 即刻用數碼相機影低先!

出左機場, 買左車票去池袋. 由於要一小時後才有車, 我們就去食左碗拉麵先. 在機場, 又有電玩中心, 又有公仔夾, 不過d公仔舊左d, 所以冇玩到.

由羽田機場去池袋, 都係一個鐘左右, 雖然係下午四點幾, 但好好彩, 係冇塞車的. 與原定的時間差唔多抵達酒店Metropolitan, 間房都好寬敞, 不過就冇Hyatt咁豪喇, 仲好‘應’聲, 有人行過就一定聽到.

放低行李後, 我們就攞齊地圖, 又立即出發, 去Sanrio Puroland. 嘩, 第一次搭有名的JR山手線, 真係有d緊張. 池袋係個大站, 我要開始入腦, 認住酒店係南面/中央口. 跟據地圖指南, 我們搭山手線到新宿, 轉京王相撲原線到多犘中心站, 但企左係售票機前, 我們搵極都搵唔到去多犘中心要幾錢. 問日人, 佢地都唔知, 但依我們的聰明, 絕對難唔到我們. 我們求其買張轉車車票, 去到補錢就得啦!

話咁快去到新宿, 嘩, Shinjuku, 好多人呀, 行去京王線, 都幾遠. 到月台, 我們立即跳上去橋本的特急列車, 因為我們又幾急, 宜家都差唔多六點, Puroland關八點架! 好彩, 架車係停多摩中心的.

約六點半, 我們到達多摩中心站, 呢到都好多舖頭, 又有公仔夾喎… 不過, 我們都係搵Hello Kitty先啦! 賣飛的人都好醒目, 俾左份中文的map, 但呢d中文map, 我通常都睇唔明.

入到去, 就有個show剛開始, 係一個黑麻麻的show, 全日文對白, 好彩中段有d Sanrio的人物出黎點綴一下. 個show未完, 我們就去第二度, 而我們有個重任, 就係要去探Hello Kitty, 入屋費, 每位500yen. 去到門口, 竟然冇人排隊, 只的我們兩人. 入屋前, 仲要按門鐘先開門架!

嘩, 好靚呀! 一入去就係廚房同飯廳. 好大呀, 仲有係樣樣野都係有Hello Kitty嘜頭呀! 我們掛住影, 間屋的,電話不停響都唔理, 但由於電話真係響唔停, 陳小姐終於拎起電話, 講左d唔知咩就放低. 就係此時, Hello Kitty就出左黎喇! 犀利呀, 好大隻呀… 去另一面同Hello Kitty影完相, 再影埋個洗手間, 就參觀完畢. 一出門口, 又見到條人龍喇, 真係夠運呢!

可能係夜的關係, 四周靜應應, 我們買的又唔係任玩套票, 所以都冇玩其他機動遊戲, 只係周圍行下咁. 除左shopping, 總離唔開參觀一下夾公仔機的. 而我們唔使夾, 在個area行在兩個圈, 就執左成六, 七張隨夾公仔附送的獨有Sanrio卡, 好靚架, 係d人冇拎走, 咁就梗係唔好浪費啦! 我們總共逗留左約一小時, 正想離開時, 在出現處有一大班卡通人物同大家影相, 好彩又係唔多人, 唔使搶之下同左Kitty Pa Pa, Ma Ma, Melody同馬騮仔影相, 總括來說, Puroland都有唔錯的收穫!

我們沿路返去, 就在行去車站個corner位, 終於見到Uniqlo喇! 聽講d野又平quality又好! 宜家都7:50, 明知間舖收8:00, 我們都要入去逛一轉. 呢一轉, 都轉左半小時, 之後拎住兩個袋出番黎. 由於明天有緊密行程, 我們決定返去池袋, 唔去新宿. 夜晚餐飯, 幫襯酒店對面的松屋, 終於食到日本的牛肉飯喇, 宜家度度都做特價, 250yen就有一碗大牛飯喇, 加個味噌汁, 兩個人都係600幾yen咋!

夜晚, 我們又收拾行李, 拎個細拖o急, 大背囊, 準備明天一早出征迪士尼!

Sanrio Puroland ~ Kitty屋企
創作者介紹

彭彭堂

ec2eat 發表在 痞客邦 PIXNET 留言(10) 人氣()


留言列表 (10)

發表留言
  • carjaswong
  • 我在98年跟團遊大阪京都,第一晚就是住hyatt,還以為日本間間酒店都咁正!<br />
    <br />
    那個早餐非常豐富,carmen到現在仍有提起。
  • ec2eat
  • 我晌房食杯麵咋...<br />
    <br />
    國際品牌, 質量點都有保證!<br />
    <br />
    咁跟住個幾晚,係咪標準日本standard個d呀?
  • Ah ming
  • 小彭你好快手呀,真是睇都睇唔切
  • carjaswong
  • 跟著第二、三晚住進箕面溫泉,房是舊了點,但第一次住<br />
    榻榻米兼有溫泉浸,從此愛上了溫泉,不能自拔。<br />
    <br />
    最後一晚在大阪市中心,很普通的商務酒店。見識了房間之小。
  • 老c
  • 居然係內陸機去東京!? 有趣喎...... 不過我覺得內陸機仲花時間過新幹線, 因為頭尾計<br />
    埋往返機場果d時間, 唔太化算, 同意否???<br />
    <br />
    Hello Kitty Land好正架, 我覺得入去影下相就好夠了, 唔駛買任玩pass。所以你兩個都<br />
    玩得好聰明! ^.^
  • 小彭
  • 老c, 絕對同意啦!<br />
    <br />
    程內陸機係改open jaw ticket連埋ge, (好似加500定700), 唔係貴, 不過加埋d來回機<br />
    場的時間, check in同拎行李的時間, 加上駁唔到最快的車, 個次大概係用左6個鐘! 第一<br />
    次嘛... 先會出現呢個程情節!<br />
    <br />
    宜家就算剩係東京大阪來回兩邊走, 唔買pass的話, 都可以好似jason兄咁買jtb <br />
    package, 又可以坐nozomi, 價錢又合理!
  • 小彭
  • 同埋hello kitty個度, 如果係sanrio fans或有d童心, 真係值得去一下!
  • largeheadboy
  • metropolitan 真係唔錯<br />
    早餐在頂樓餐廳<br />
    天氣好時更可以見到富士山添!
  • ec2eat
  • 唔好意思, 遊記連載要暫停一會!
  • lau2tang
  • metropolitan係交通方便,頂樓餐廳風景一流,但早餐質素則一般!